ភ្នំពេញ៖ រដ្ឋបាលខេត្តកំពង់ធំបានជូនដំណឹងដល់ពលរដ្ឋដែលរស់នៅតាមបណ្តោយដងស្ទឹងសែន បង្កើនការប្រុងប្រយ័ត្ន ខណៈទឹកស្ទឹងសែននៅស្ថានីយកំពង់ធំ និងតាមបណ្តោយដងស្ទឹងសែនកំពុងតែហក់ឡើងជិតដល់កម្រិតប្រកាសអាសន្ន។
រដ្ឋបាលបាលខេត្តកំពង់ធំបានណែនាំពលរដ្ឋបង្កើនការប្រុងប្រយ័ត្នខ្ពស់ ដោយត្រូវរៀបចំសម្ភារឯកសារសំខាន់ៗ និងស្វែករកទីទួលសុវត្ថិភាពដែលនៅក្បែរបំផុត និងសូមរាយការណ័ដល់អាជ្ញាធរមូលដ្ឋានក្នុងករណីមានការលិចលង់ណាមួយ កើតឡើង។
រដ្ឋបាលខេត្តបានណែនាំឱ្យអាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ ត្រៀមរៀបចំ ផែនការអន្តរាគមន៍ និងត្រូវរៀបចំទីទួលសុវត្ថិភាពឲ្យបានសមរម្យក្នុងការជម្លៀសប្រជាពលរដ្ឋរងគ្រោះ ម្យ៉ាងវិញទៀត ត្រូវផ្សព្វផ្សាយ ណែនាំឲ្យប្រជាពលរដ្ឋយកចិត្តទុកដាក់លើអនាម័យ ដើម្បីជៀសវាងជំងឺ ឆ្លងផ្សេងៗ។
ក្រសួងធនធានទឹក និងឧតុនិយមបានប្រាប់ឱ្យដឹងថា នៅតំបន់ខ្ពង់រាប តំបន់ទំនាបកណ្តាល និងតំបន់មាត់សមុទ្រ នឹងមានភ្លៀងធ្លាក់ លាយឡំផ្គរ រន្ទះ។ ចំណែកនៅតំបន់មាត់សមុទ្រ ផ្ទៃសមុទ្រអាចមានខ្យល់បោកបក់ និងមានរលកខ្ពស់ៗ៕
